Kumpui sul a lo vei chang  hian
Phuahtu: Rokunga
Satu: H Lalmuankimi, Zoramchhani, Bawnkawn Pastor Bial Zaipawl, Mizoram Synod Choir
Kumpui sul a lo vei chang hian lunglen a tho leh thin,
Ngai lo leh lawm lo reng awm hlei lo;
Kan ngaih Krismas nieng a lo zam thar leh ta,
A mawi tizual an Bethlehem par nen,
A lo vul ta e, par ang kan lawm.
Aw a va mawi em he ni lawmawm hun tawite hi,
Kan vannei em em lawmna ni kan tawng leh ta;
Lungrual takin zai i vawr ang aw,
I lungngaihna chu puan ang hlip rawh.
Awmlai vei leh lusun fate chan tawk hi dawn ve teh,
Hnutiang mualliam hnu ngaiin an tap e;
Par ang an lawm hnu he ni ropui lo thlen hian,
Chhungkim dar ang len lai kha ngai zual in
Tapin luaithlipui an nul ngei ang.
Karhla a leng rualduh zawng te in dam lai em ni le?
Krismas ni lawmawm a lo eng leh e;
Chung Pathian in damten min veng tawn zel rawh se
Dam takin aw kan intawn leh hma zawng
Hlimin zai ang che muttui mangtha.
Chung khuanu lengin min hual se lawmin i zai ang u,
A then thinlai na pawh hi dam rawh se;
Kan nghah ni lawmawm tak chu a lo thleng leh ta,
I phurrit zawng zawng te chu kalsan la,
Hlim la huntha i neih chhung hian in.